33 taon na sa serbisyo nagantimpalaan! Janitor sa Manila City Hall pinagkalooban ng pabahay ni Yorme

Larawan mula sa Facebook page ni Mayor Isko Moreno Domagoso

Dahil sa pagpapahalaga at pagmamahal sa trabaho ay nagantimpalaan ang isang empleyado ng Manila City Hall ng pabahay ni Mayor Isko Moreno.

Bukod sa plake ng pagkilala sa kanyang dakilang serbisyo, bahay at cellphone ang ibinigay ni Yorme sa isang Janitor na 33-taon nagtrabaho sa munisipyo ng Maynila.

Kasama si Vice Mayor Honey Lacuna, ang magandang balitang ito ay ibinahagi ng Alkalde sa kanyang Facebook page kamakailan lang.

“Siya po si Melchor, empleyado ng ating City General Services Office. 33 taon na po siyang nagtatrabaho sa City Hall,” paliwanag ni Mayor Isko.

“Bilang pagkilala sa kanyang inialay na serbisyo sa lungsod, ginawaran natin siya hindi lang ng smartphone pati na rin pabahay para sa kanyang pamilya. Mabuhay po kayo!” dagdag pa ni Mayor Isko.

Si mang Melchor Duca ay taga-Cavite na natutulog lang umano sa munisipyo mula Lunes hanggang Biyernes at umuuwi ng kanyang bahay tuwing Sabado lamang.

Ang gantimpalang ibinigay ni Yorme ay mula umano sa pabahay na naitayo sa ilalim ng housing program ng lungsod.

Ayon din sa ulat ng Journal website, ang gantimpalang ito ni Mang Melchor ay may kaugnayan sa Administrative Order No. 29 na inaprubahan ni Pangulong Rodrigo Duterte noong Enero 10, 2020.

Kasama din sa AO No. 29 na nararapat bigyan ng gratuity pay ang mga empleyado ng gobyerno na ang estado ay job order at contractual.

Hanggang tatlong libong piso umano ang maaring ibigay sa kanila, kung saan ay nasa 4000 na empleyado umano ng Manila City Hall ang maaring makatanggap ng bonus.

Samantala, dalawang libong piso naman ang halagang inaprubahan ni Mayor Isko.