Isang 187 kilos na higanteng lapu-lapu, nahuli sa Antique: Inabot ng limang oras bago naiahon mula sa dagat

 

Talagang napakayaman ng karagatan ng Pilipinas sa mga lamang dagat, patunay na dito ang iba’t ibang isda na nahuhuli ng ating mga mangingisda.
 
Unang nakahuli ng higanteng lapu-lapu ang isang mangingisda sa Palawan na may timbang na umabot sa 123 kilos. At nitong Hunyo 2022 naman ay isang napakalaking lapu-lapu na naman ang nahuli sa Antique na may timbang na 187 kilos na nabingwit ni Rex Vega Jr. ng Antique.
 
Ang unang higanteng isda ay nahuli umano noong May 3, 2022 at ito ay naibenta ng mahigit Php19, 000. Kaya naman dahil dito ay napatunayan na marami pang mga higanteng isda sa ating karagatan.
 
Ayon pa sa isang Facebook post ng tiyahin ni Rex, hindi umano naging madali ang pagkuha sa kabuuang timbang ng isda dahil hind inga ito kasya sa timbangan.
 
 “Hindi kasya sa timbangan ang isda.” Ayon pa sa caption ng post ni Reah Vego Davidson

 
Kinailangan pa umano na hiwain ito para makilo at malaman ang eksaktong timbang.
 
“Ulo ay 50 kilos. Lamang loob 30 kilos. Laman ay 107 kilos. Total ay 187 kilos.” Ani Reah
 
Dahil na rin sa sobrang laki ng isda ay nahirapan din sila na iahon ito mula sa dagat.
 
“Daily routine na po ni Rex na during night time ay humuhuli po siya ng isdang marot or galunggong para ipain sa madaling araw sa kanyang bingwit or hook at itali sa balsa.
 
“So nung napansin niya na may kumain sa pain niya ay sinikap niya pong iahon ito, ngunit hindi po niya kinaya kasi lumalaban po yung catch niya.”
 
“Around 5:00 p.m. nila naiangat yung isda at laking gulat nila nang makita ang higanteng lapu-lapu,” kwento pa ni Reah

 
Pinagkaguluhan din ang giant lapu-lapu sa lugar ni Rex.
 
“Pinagtulungan nilang hilain sa dalampasigan yung isda at dun na nagkagulo ang mga tao dahil sa bayang ito, never pa sila nakakita ng ganun kalaking isda.” Aniya
 
Nakatanggap naman ng  ilang batikos si Rex mula sa ibang netizens sa pagkakahuli ng higanteng lapu-lapu. May mga nagtanong din umano kung bakit hindi ito ibinalik sa dagat.
 
“Well, the fact is, hindi sinasadyang mahuli or hulihin ang giant lapu-lapu na yun dahil ang baits maman talaga ay sinadya para sa blue marlin or yellow fin tuna or tangigue lamang.
 
“Nagkataon yung lapu-lapu ang nabingwit. After almost five hours of struggle na makuha or maiahon ang nasabing isda ay patay na itong naiahon sa tubig after almost six hours, so, sa palagay niyo kaya maibalik niyo pa yun sa tubig?” paliwanag naman ni Reah sa kanyang hiwalay na post noong Hunyo 27.
 
Sinabi din ni Reah na tanging pangingisda lang ay hanap-buhay ni Rex na may tatlong anak na sinusuportahan.